أعلن الفنان اللبناني نيكولا معوض السبب وراء اعتذاره عن تقديم بطولة فيلم "أصحاب ولا أعز"، وذلك عبر حسابه على موقع فيسبوك.

وكتب معوض قائلًا: "يلّي متابعني منيح بيعرف انو ما بحياتي اعتذرت عن دور و بعدين طلعت قلت "هيدا الدور كان إلي".. مع اني ما بلاقيها غلط، بالعكس بلاقيها شغلة كتير عادية و ما فيها اي إنتقاص لا من الدور و لا من الممثل يلّي أخد الدور."

وتابع: "بَسّ اليوم، مع كل الجدل يلّي عم نشوفوا حول فيلم "اصحاب ولا أعزّ"، كتير حابِب قول انو كان المفروض كون واحد من مُمَثّلي الفيلم.. و كمان حابب قول انو سبب اعتذاري ما إلو علاقة أبداً بالجَدَل الجاهِل العَقيم يلّي عم نشوفوا حاليّاً."

وعن سبب اعتذاره قال: "عتذرت لانو ظروف كورونا خلّت التصوير يتأجَّل أكتر من مرّة و كان عندي ارتباط مُسبَق بتصوير خارج لبنان، فا اضطرّيت انسحب من المشروع و انا عارف مُسبَقاً اني كتير رح إزعَل لمّا شوف الفيلم".

وأضاف: "كنت مفكّر حالي رح إزعَل بَسّ لانو الفيلم فنيّاً كتير حلو كمان لأنّي كنت عارف مُسبقاً كيف رح يكون أداء كل انسان اشتغل قدّام الكاميرا و ورا الكاميرا تحت إدارة المخرج يلّي بحبّو كتير وِسام سمَيرة".

وعن الجدل حول الفيلم قال: "بَسّ اليوم لقيت حالي زعلان لأسباب تانية.. زعلان لأنو هالفيلم كان رح يكون فرصة تخلّيني قول بالفعل مش بَسّ بالحَكي قدّيه الفَنّ أعلى و أسمى من كل القيود و الأحكام و الرقابات، و قدّيه للأسف نحنا عايشين بمُجتمع منافق مُزدوِج المعايير".